ကျွန်တော့် မြင်ကွင်းထဲမှာ အင်္ကျီဗလာနဲ့ စီဒီချပ်များနှင့် အလုပ်ရှုပ်နေသော လေးဖြူကို ဦးဆုံးတွေ့လိုက်ရသည်။
သူကနောက်ပြန်လှည့်ကြည့်ရင်း "ဟား......." ဆိုသော ရင်ခေါင်းသံကထွက်လာပြီး
"ဘာလို့ဖုန်းကြိုမဆက်တာလဲ...ကျွန်တော်ရှောင်လို့ရတာပေါ့" ဟုရယ်မောရင်းပြောလာသည်။
ကျွန်တော့်ကိုမြင်တာနှင့် အင်တာဗျူးဖို့လာတာမှန်း သူတန်းသိတတ်သည်။ ဟုတ်သည်။ စာနယ်ဇင်းသမားဆိုတာကလဲ ဒီလောက်ခရီးအဝေးကြီးကို ဂျနယ်အလုပ်တွေပစ်ပြီး ကိုယ့်အကျိုးမပါပဲ သွားတတ်ကြသည်မဟုတ်။ သာရေးဖြစ်ဖြစ် နာရေးဖြစ်ဖြစ် ထိုသာရေးနာရေးကိုပင် စာမျက်နှာပေါ်တင်ပြီး ဂျနယ်အကျိုးအတွက်ရေးတတ်ကြသည်။
"အေးလေဗျာ...ဖုန်းဆက်ထားရင် ခင်ဗျားက ရှောင်သွားမှာ မဟုတ်လား"
"ကျွန်တော်မဖြေချင်တော့ဘူး ကိုဥိးဆွေရ....မေးခွန်းတွေကို မွန်းကျပ်လာပြီ။ ...........မဂ္ဂဇင်းအတွက်ဆိုပြီးမေးခွန်းတွေ လာပေးသွားတယ်....ကျွန်တော့အတွက် မေးခွန်းတွေမလိုတော့ပါဘူး...စာမျက်နှာပေါ်ပါဖို့ လိုအပ်နေတဲ့လူတွေအများကြီးရှိတယ်..အဲဒီလူတွေကိုမေးပါဗျာ" ဟုဆိုလာသည်။
သူ့စကားဆုံးတော့ အနုပညာရှင်နှင့် စာနယ်ဇင်းသမားများအကြားဆက်နွယ်မှုကို တွေးလိုက်မိသည်။ အသစ်ဘ၀မှာတော့ စာနယ်ဇင်းစာမျက်နှာများသည် သူတို့အတွက်အရေးပါခဲ့သည်။ အောင်မြင်ထင်ရှားသွားစဉ်မှာတော့ သူတို့တွေက စာနယ်ဇင်းများအတွက် တဖန်အရေးပါလာပြန်သည်။ ယခုလည်း အပတ်စဉ် 20 သာ ရှိသေးသော ကျွန်တော့ Middle Line ဂျာနယ်အတွက် လေးဖြူကအရေးပါနေလေသည်။ မဖြေချင်ပေမယ့် သူ့နှုတ်က စကားတွေထွက်ဖို့ ကျွန်တော်ကြိုးစားရပေမည်။
"ဂျာနယ်တွေဖတ်ရတာလဲဗျာ...ခိုးကူးရယ် ဟစ်ဟော့ရယ် ရော့ခ်ရယ်....ဒါတွေပဲဖတ်နေရတယ်...တခြားရေးစ၇ာတွေအများကြီးရှိပါတယ်"သူကထိုသို့ပြောရင်း စီးကရက်တစ်လိပ်ကို မီးညှိဖွာရှိုက်လိုက်၏။ ကျွန်တော်ကတော့ ဘာစကားမှ မပြန်ဖြစ်ဘဲ သူ့ကိုသာေးကြည့်နေမိခဲ့သည်။ သူ့စကားက ချက်ချင်းပြောင်းသွားပြီး
"ခင်ဗျား ဆံပင်တွေဖြူနေပြီ" ဟုပြောလာသည်။
ကျွန်တော့ကိုဆံပင်ဖြူနေပြီဟု ပြောလာသည့် သူ့ခေါင်းတွင်လည်း ဆံပင်ဖြူတွေက ကျိုးတို့ကျဲတဲ။ သြော် အသက်တွေလည်းကြီးကြပြီ။
"ကျွန်တော်သိပ်မကြာခင် တောင်ကြီးသွားမယ်...အမေ့ဆီသွားမယ်"
ကျွန်တော့စိတ်က တောင်ကြီးမြို့က ပျဉ်ထောင်အိမ်လေးထဲက သူ့အမေဆီရောက်သွားပြန်သည်။ အဲဒီကို သျှားတေးထုတ်လုပ်ရေးက ကိုဇော်ထူးအောင်နှင့် လေးဖြူ၏တေးစုတစ်ခုနှင့်ပတ်သက်ပြီး ရောက်သွားဖူးသည်။ သားများကဲ့သို့ပင် ထွားထွားကြိုင်းကြိုင်းအမျိုးသမီးကြီး၏ မျက်နှာပေါ်က သားများအတွက် ၀မ်းသာပီတိကို ကျွန်တော်ကူးယှက်ခံစားခဲ့ဖူးသည်။
ကျွန်တော်တို့အကြားမှာခေတ္တငြိမ်သက်နေ၏။
စက္ကန့်အနည်းငယ်ကြာတော့ ကျွန်တော်နှင့်အတူပါသည့် မိုးပိုင်စိုးကို ဘာလုပ်တာလဲ ဟုမေးသည်။
ဓာတ်ပုံဆရာဟုပြန်ဖြေတော့ "ကောင်းတယ်...ဓာတ်ပုံရိုက်နေတာပဲကောင်းတယ်" ဟုဆိုပြန်သည်။ ကျွန်တော်တဟားဟားရယ်လိုက်မိသည်။ သူ့ကြည့်ရတာ စာနယ်ဇင်းများနှင့်ပတ်သက်ပြီး တစ်ခုခုရှိနေသည်ဟု ကျွန်တော်တွေးထင်လိုက်မိသည်။ စာနယ်ဇင်းသမားများနှင့် သိပ်အဆင်မချောသည့် အနုပညာသမားများထဲတွင် သူလဲပါသည်။ တချို့သော စာနယ်ဇင်းသမားများ၏ ရေးသားတင်ပြပုံ မေးပုံ မြန်းပုံတွေကို သူသိပ်ဘ၀င်မကျတတ်။
သူအခန်းထဲသို့ဝင်သွားသည်။ ချက်ချင်းပြန်ထွက်လာပြီး လက်ထဲမှာ လွယ်အိတ်တစ်လုံးပါလာသည်။
လွယ်အိတ်ထဲက စီဒီချပ်များကိုဆွဲထုတ်သည်။ ၀ါသနာရှင်လူငယ်များ၏ sample ချပ်များဆိုတာ ကျွန်တော်သိလိုက်သည်။ သူက Ice Cream ဆိုသောအချပ်ကို Player ထဲထည့်ရင်း
"ဒီကောင်တွေ အရမ်းကောင်းတယ်.....သေသွားမယ်....ခင်ဗျားနားထောင်ကြည့်"
Punkတေးသွားက မြူးကြွစွာထွက်လာ၏။ သူစည်းချက်အလိုက် ပေါင်ကိုလှုပ်ရင်း " အဲဒါ ၅ တန်းပဲရှိသေးတယ်လို့ပြောတယ်။ ခင်ဗျားသူတို့ကို မေးသင့်တယ်။ သူတို့အတွက် စာမျက်နှာလိုတယ်။"လေးဖြူလိုလူကညွှန်းဆိုနေမှတော့ ဂီတကို နကန်းတစ်လုံးနားမလည်သည့် ကျွန်တော့လိုလူက လက်ခံရုံသာ။
"ကျွန်တော့်ကို ဒီအခွေ ဇော်လတ်ပေးတာ။ ဇော်လတ်ဆီဖုန်းဆက်မေးပေးမယ်"
ဆိုကာ ချက်ချင်းပင် မောင်မောင်ဇော်လတ်ဆီ ဖုန်းဆက်၍ Ice Cream အဖွဲ့အကြောင်းဖုန်းဆက်မေးပေးသည်။ အငယ်ဆုံးကလေးက ၅ တန်း.......အကြီးဆုံးမှ ၈ တန်းဆိုတော့ ထိုအဖွဲ့ကိုစိတ်ဝင်စားပြီး ကျွန်တော်လိပ်စာယူလာခဲ့သည်။
သူနောက်တစ်ချပ်စက်ထဲထည့်ပြန်သည်။ Rockတေးသွားတစ်ခုက မြူးစွာထွက်လာသည်။
"အဲဒါ Iron Cross တီးတာမဟုတ်ဘူး...Emperor တီးတာလဲမဟုတ်ဘူး.......ဒီကောင်တွေ သူတို့ဘာသာချထားတာ" ဆက်ပြောပြန်၏။
"ဒီကောင်တွေ ဘာလို့ ဒါတွေထလုပ်တာလဲမသိဘူး.....ကျွန်တော်တို့ရှေ့ကကောင်တွေ အသုံးမကျလို့ဖြစ်မယ်" ဟု သူ့ဘာသာမေးပြီး တဆက်တည်း သူ့ကိုယ်သူဝေဖန်လိုက်လေသည်။
"သူတို့တွေဆက်လုပ်ဖို့ ပိုက်ဆံမရှိတော့ဘူး"
သူကလွယ်အိတ်ကိုပြရင်း "တစ်နေ့တစ်နေ့ ကျွန်တော့ဆီရောက်လာတာတွေမနည်းဘူး...လူငယ်တွေဟာ ဟစ်ဟော့တွေချည်း လုပ်နေကြတာမဟုတ်ပါဘူး" ဟုဆိုလေသည်။
သူကစက်ကိုပိတ်လိုက်ပြီး စီးကရက်နောက်တစ်လိပ်မီးညှိပြန်၏။ ကျွန်တော်သိချင်တာလေးတစ်ခုမေးလိုက်၏။လွန်ခဲ့သည့်ခုနစ်နှစ်ဝန်းကျင်က "နောင်၁၀နှစ်ကြာရင်ခွေထုတ်ရဲတဲ့လူ ရှိမှာမဟုတ်တော့ဘူး" ဟု ကျွန်တော်နှင့်အင်တာဗျူးတွင်ဖြေခဲ့ဖူးသည်။ ထိုစဉ်က ခုလိုခိုးကူးဆိုတာအသံပင်မထွက်သေး။ ခုတော့ ခိုးကူးကြောင့်ခွေထုတ်ရဲသူရှားစပြုလာပြီး။သူဘာကြောင့်ထိုသို့ ပြောနိုင်ခဲ့ပါသနည်း။
" ကိုလေးဘာကြောင့်အဲလိုပြောနိုင်တာလည်း"
ကျွန်တော်မေးတော့ အမှတ်တမဲ့ဖြေလိမ့်မည်ဟုတ်ထင်ထားသည်။
ကျွန်တော်လွဲသွားပါသည်။
သူငြိမ်နေ၏။ မထူးတော့။ နောက်မေးခွန်းတစ်ခုမေးလိုက်ပြန်၏။
"အပြင်မှာပြောနေကြတယ်။ ခင်ဗျားတစ်ကိုယ်တော်ရှိုးပွဲတစ်ပွဲပြောဆိုပြင်ဆင်နေတယ်ဆို"
သူလုံးဝပြန်မဖြေ။ ကျွန်တော်အင်တာဗျူးဖို့ လုံးဝလက်လျှော့လိုက်ရသော်လည်း ငါးမရရေချိုးပြန်မည်ဟုတ်ဆုံးဖြတ်ကာ အမှတ်တရဓါတ်ပုံများ ကိုတော့ရအောင်ရိုက်ခဲ့ပါသည်။
လေးဖြူကိုနှုတ်ဆက်ပြီး အပြန်ကားအပေါ်မှာဒီနေ့ လေးဖြူနှင့်ဆုံတွေ့ ခဲ့ရသည်ကို ဘယ်လိုရေးရပါ့မလည်းဟုတ်စဉ်းစားနေမိပါတော့သည်။
ကိုဦးဆွေ
No comments:
Post a Comment